Vinstri grænir enn úti á túni - þó komið sé haust.

Morgunblaðið á ekki að ýta undir eða stuðla að því að þegnar þessa lands séu að gera sig að kjánum fyrir framan alþjóð - sérstaklega ekki að nafngreina fólk að óþörfu.

Mér sýnist nefnilega að það sem sameinar þessa einstaklinga VG séu einhverjir örðugleikar sem heilbrigðiskerfið ætti auðveldlega að ráða við - ef ekki verður skorið meira niður. Það lýsir sér í því; að það virðist vera nákvæmlega sama hvað Nei-sinnar eru oft  leiðréttir og mikið af gögnum og upplýsingum borið á borð fyrir þá; að það líður ekki dagurinn að sömu stöðluðu frasarnir eru komnir á loft eins og meðfylgjandi áskorun ber með sér.

Ég þori að fullyrða að aðeins brot af þessu fólki veit eitthvað um Lissabonsáttmálann sem það ber svo oft fyrir sig. Þá hljómar það líka eins og það viti ekkert um hið svokallaða "aðlögunarferli" enda ekki nefnt eitt einasta dæmi því ferli til staðfestingar. Svo ég tali nú ekki um þegar það nefnir " engar undanþágur" frá sameiginlegri fiskveiðistefnu sambandsins og efni því tengdu. Þar eru flestir því miður algerlega úti á túni. Og af hverju fullyrði ég það; jú af fenginni reynslu þá veit ég að allur almenningur í landinu veit sama og ekkert um íslenska fiskveiðistjórnunarkerfið -  og því er auðvelt að draga þá ályktun að það sé enn verr að sé um málefni tengdu hinni sameiginlegri fiskveiðistefnu ESB.

Ég sé ekkert að því að fólk kjósi gegn aðild þegar þar að kemur. En það á alveg að vera nóg að segjast gera það af hugsjóna ástæðum. Það er alla vega meiri reisn í því en að leggja sig í framkróka við að skrumskæla sannleikann í hvert skipti sem það tjáir sig um þessi mál.      

Skorað á þingflokk VG að fylgja ESB-stefnu flokksins

Athugasemdir

[Sigurður Haraldsson, 23.10.2010 kl. 03:22]

Ertu farinn að svitna vegna væntanlegrar kosningar um að hætta aðildarviðræðum? Ef þú ert svo viss um að þetta sé það eina rétta fyrir okkur þá skaltu kjósa á móti það er lýðræði!

[Gunnar Heiðarsson, 23.10.2010 kl. 08:27]

Það eru aldeilis rökin hjá þér Atli. Að væna hóp fólks um heimsku eða jafnvel eitthvað enn verra er ekki bara rökleysa heldur stór hættulegt og lítilmannlegt.

Vinstri Grænir er stjórnmálaafl, hvaða skoðun sem menn hafa á stefnu þess flokks breytir engu þar um. Eitt af þeim stefnumálum sem þessi flokkur hefur alla tíð verið einhuga um er að Íslandi sé betur borgið utan ESB, þetta er þeirra skoðun og hafa þeir jafn mikinn rétt á henni eins og réttur Samfylkingarfólks til hins gagnstæða!

Þessi áskorun til forystu flokks VG er í anda þessarar stefnu.

Nú hef ég aldrei kosið VG og geri ekki ráð fyrir að gera það. Ekki er það vegna þess að ég telji stuðningsfólk þess flokks heimskara en annað, heldur vegna þess að sum áhersluatriði flokksins falla ekki að minnum skoðunum, þó ég sé sammála þeim í andstöðunni við ESB.

[Atli Hermannsson., 23.10.2010 kl. 13:16]

Sæll Sigurður. Ég er ekki farinn að svitna svo neinu nemur, enda með góða tilfinningu fyrir því að samningurinn verði samþykktur þegar fólk sér að hann verður okkur hagstæður. En það sem pirrar mig stundum er þegar andstæðingar aðildar gefa sér fyrirfram að þetta eða hitt sé ekki hægt eða gengur með þær grillur að ESB ríkjum gangi það eitt til að ræna okkur.   

[Atli Hermannsson., 23.10.2010 kl. 13:24]

Sæll Gunnar. Það er fjarri því að ég væni fólk um heimsku þó það vita ekki alla hluti í þessu flókna umsóknarferli frekar en ég og þú. Þvert á móti eru á þessum lista fjölmargir einstaklingar sem ég ber mikla virðingu fyrir og virði skoðanir þeirra og meiningar fullkomlega. Kannski þess vegna sem maður varð fyrir vonbrigðum með þessa ályktun.

Ég er hins vegar sannfærður um að við komum ekki til með að vita kosti og galla þess að ganga í ESB án þess að láta umsóknarferlið hafa sinn gang - en það liggur eiginlega í augum uppi.

Það sem andstæðingar aðildar kallar “aðlögun” og sé þegar hafið er gott dæmi um á hversu miklum villigötum umræðan er. Það rétta er að það á að gera úttekt á stjórnsýslunni með það að markmiði að gera hana betri, skilvirkari og samhæfa hana því sem ESB telur það besta fyrir öll aðildarríkin. Sú úttekt ætti að gagnast okkur þó við gengjum ekki í ESB. Eða er landinn annars svo yfirgengilega ánægður með stjórnsýsluna að ekki megi gera heilstæða úttekt á henni? Hvað sem kann að koma í ljós; munum við ekki þurfa að gera neinar breytingar á stjórnsýslunni áður en að inngöngu kemur - frekar en við viljum. En það er eðlilega talinn kostur að vera búnir að gera það sem gera þarf áður en að inngöngu kemur. Því fyrr verður búið að aflúsa stjórnsýsluna sem ekki er vanþörf á.

En hvaða öfl eða sérhagsmunasamtök eru það eignlega sem markvisst hamast gegn því að úttekt sé gerð á stjórnsýslunni? Hafa menn eitthvað að fela.. við hvað eru menn hræddir? Ég vil komast að því.