Einn í valnum.

Það ríkir skelfilegt ástand þessa dagana á Sri Lanka eftir að ríkisstjórnin sagði upp vopnahléssamningnum frá 2002. Það er þó aðeins stigsmunur á þegar saga þjóðarinnar frá fullveldi 1948 er skoðuð. Það er aðallega vegna veru firðargæslusveitar okkar þar og fulltrúa frá Þróunarsamvinnustofnun í kjölfar flóðanna 2005 sem áhugi okkar hefur beinst að landinu. Ég hef haldið góðu sambandi við fólk þar í 20 ár og því kemur ástandið mér ekkert á óvart, því ófriðurinn hefur verið nær linnulaust frá 1984. En þá hófu Tamílatígrarnir sjálfsmorðsárásir sínar sem staðið hafa með litlum hléum. Það má því segja að þeir séu upphafsmenn þeirrar aðferðar að bera sprengju um mittið. En þess ber að geta að oftar en ekki hafa það verið unglingsstúlkur sem hafa verið notaðar í þeim tilgangi.

Því fer fjarri að einn og einn ráðherra sem liggur í valnum sé dæmi um versnandi ástand. Það gæti þess vegna verið af hinu góða, því stjórnvöld í landinu eru gegnsýrð af spillingu og ganga fyrir mútum og annarri ónáttúru. Vandamálið á Sri Lanka er stjórnmálalegs eðlis en ekki trúarlegs eins og margir halda. Það snýst um kúgun Singalista á Tamílum sem ekki geta sætt sig við að vera annars flokks þegnar með lítil sem engin réttindi. Því hafa þeir gert uppreisn sem engan endi ætlar að taka. Það má segja að Tamílarnir séu búnir að reyna allt sem hægt er. Eftir að hafa reynt að semja við ríkisstjórn Signgalista frá 1972 hafa þeir svo dæmi séu tekin;  sprengt banka, járnbrautir, trúarsamkomur Singalista.... ásamt því að hafa árið 2001 ráðist inn á alþjóða flugvöllinn við Colombo og sprengt yfir morgunkaffinu átta herþotur, tvær stórar Airbus farþegavélar og skemmt þrjár til viðbótar. En það var ekkert minnst hér heima á árás Tígrana á flugvöllinn á sínum tíma... þótti sennilega ekki nægilega fréttnæmt þá.    

Það er því ljóst að ríkisstjórn Sri Lanka þarf fyrr eða síðar að semja við Tamílana... maður verður að semja við þá sem eru bæði sterkari og klárari en maður sjálfur... en þar sendur hnífurinn í Singalistum. 

 

Sjáið einnig neðar á síðunni vangaveltur mínar frá því um daginn.

Ráðherra féll í sprengjuárás