Andspyrnan

Það skýtur alltaf annars slagið upp kollinum sú hugmynd að gera þurfi eitthvað verulega róttækt til að upplýsa almenning, í eitt skipti fyrir öll, um hið liðónýta fiskveiðikerfi sem engu hefur skilað og það ranglæti sem það hefur haft í för með sér.  

Í  mai síðastliðinn eftir að Hafró hafði kynnt niðurstöður sínar úr síðasta togararalli. Þá bar á hugmyndum hér á blogginu hans kristins frá Bakkafirði um að fara í fyrirlestraferðir um landið, stofna grasrótarsamtök, vini landbyggðarinnar eða andspyrnuhreyfingu eins og ég komst að orði.

Það er ef til vill aukatriði hvað hreyfingin á að heita. En hún þarf númer eitt að vera þverpólitísk - ef af henni verður. Það þarf umfram allt að laða að henni einstaklinga úr öllum flokkum. Þá má ekki vera búið að gefa sér fyrirfram hvaða „kerfi" eigi að berjast fyrir - eða hvað það eigi að heita. Kerfið má eftir sem áður heita kvótakerfi fyrir mér. Það þarf bara númer eitt að hafa það að markmiði að uppfylla fyrstu grein fiskveiðistjórnarlaganna... Það er greinin sem fjallar um að nytjastofnar á Íslandsmiðum séu sameign íslensku þjóðarinnar og að stuðla beri að verndun og hagkvæmri nýtingu allra fiskstofna og tryggja með því trausta atvinnu og byggð í landinu.

Ég er hrifnastur af þeirri hugmynd að byrja skuli á því að halda veglega ráðstefnu þar sem ákveðnum aðilum, jafnt innlendum sem erlendum yrði boðið að halda erindi og taka þátt í pallborðsumræðum. Til að gera ráðstefnuna sem veglegasta og auka á trúveruleika hennar væri aðilum af "andstæðum pólum" boðið að taka þátt. Þá þyrfti að virkja fjölmiðla, stofnanir og hagsmunaaðila í greininni til að gera þetta sem veglegast Því tel ég ekki fráleitt að fá aðila eins og ráðuneytið, Fiskistofu eða jafnvel LÍÚ til að leggja málefninu lið. Af hverju ekki?

Það þarf að færa umræðuna úr skotgröfunum og til þess þurfa sem flestir að koma að málinu. En ég ætla ekki að ákveða hvernig þetta á að vera. Heldur er ég ég tilbúinn til þess að að verða til þess að leiða saman alla þá sem vilja verða "stofnfélagar". Komið endilega með tillögur, athugasemdir...eða sendið mér póst á [e-mail]  um hvernig best verði á málum haldið og hafið endilega samband við líklega kandidata sem dregið geta vagninn.