Ekki útilokað

Ekki útilokað að bætt verði við kvótann sagði Jón Bjarnason sjávarútvegsráðherra. Hann vill að ákvörðum um slíkt verði byggð á fullnægjandi gögnum og sterkum rökum. Ef Jón ætlar að byggja ákvörðun sína á gögnum frá Hafró þá geta menn gleymt aukningu strax. Þau gögn Hafró sem lögð voru til grundvallar aflaheimildum fyrir yfirstandandi fiskveiðiár eru síðan í mars. Þá hlýtur það að teljast verulega vafasamt að Hafrannsókn skuli meta stofnstærðir og ráðleggja veiðiþol stofna á upplýsingum á flokkuðum fiski - kvótakerfið er nefnilega flokkunarkerfi þar sem skip og bátar hámarka verðmætin áður en að landi er komið. Þá gerir magn og samsetning þess sem fleygt er ásamt "kvótasvindli" veiðistuðulinn ómarktækan. Því stofnstærðir eru ekki fundnar með raun-talningu eins og margir kunna að halda, heldur með umdeildu togararalli, ómarktækum veiðistuðli og ágiskuðum 18% náttúrulegum dánarstuðli -  Því er kvótum útdeilt til allt að eins og hálfs árs fram í tímann - á grundvelli rangra upplýsinga úr fortíðinni.... erum við að tala um vísindi?           

Útilokar ekki aukinn kvóta

Athugasemdir

[Árni Gunnarsson, 10.11.2009 kl. 17:47]

Vonandi er þetta aðeins upphafið að einhverri vitundarvakningu um að núverandi ástand er gengið sér til húðar. Það er hinsvegar óviðunandi að eini alþingismaðurinn sem hefur kvatt sér hljóðs til að reifa skuli vera Ólína Þorvarðardóttir. Ekki vegna þess að hún sé minna marktæk heldur vegna þess að kannski er þetta ekki sá vettvangur sem stendur henni nær en mörgum öðrum. 

[Atli Hermannsson., 10.11.2009 kl. 18:26]

Sæll Árni. Já vonandi er að verða vitundarvakning. Það er aðdáunarvert að fylgjast með Ólínu Þorvarðar og alveg sérstaklega vegna þess að þetta er ekki hennar "rétti" vettvangur. En eins og við vitum á fiskveiðikerfið fyrst og síðast að snúast um heilbrigða skynsemi. En einhverra hluta vegna hefur bæði sérhagsmunaöflunum og Hafró tekist að koma því inn hjá alþingismönnum að allt sem heyri undir sjávarútveg sé ekki nema á færi færustu "sérfræðinga" að skilja. Ólína er búinn að sjá í gegnum þá þvælu og vonandi varðar hún veginn. í þessum töluðu orðum var Ásbjörn Óttars alþingismaður og útgerðarmaður frá Hellissandi að krefjast þess að 40 þúsund tonnum verði bætt við... og ekkert helvítis kjaftæði eins og hann hefur örugglega hugsað með sér ef ég þekki hann rétt.     

[Helgi Helgason (IP-tala skráð) 10.11.2009 kl. 20:36]

Sæll Atli. Eftir því sem ég hef hlerað málin þá vil ég nú meina að þetta litla skref sem verður tekið með þessum breytingum á fiskveiðistjórnunarkerfinu sem verið er að ræða á alþingi nú er alfarið komið frá manni sem var fenginn í það verkefni. Guðjón hefur bæði rétt Jóni bónda rökin upp í hendurnar fyrir þessum breytingum og talið í hann kjark. Svo er það annað mál hvernig Ólína reynir að skreyta sig með því. Ekki hafði hún frumkvæði að því að koma þessu á koppinn.

Bestu kveðjur

[Atli Hermannsson., 10.11.2009 kl. 21:57]

Sæll Helgi. Já þú ert að tala um frumvarpið sem Jón Bjarna var að leggja fram. Það er sagt að frumvarpið hafi verið unnið í ráðuneytinu svo Guðjón hefur að öllum líkindum sett mark sitt á frumvarpið. Án þess að ég hafi legið yfir frumvarpinu, þá eru menn ánægðir með það og telja sig merkja ákveðna kompásleiðréttingu, þar sem nálin virðist loksins hafa náð að sveigja sér útúr segulsviði sérhagsmunaaflanna.

PS. Er þetta þá ekki rétta leiðin; að planta mönnum í ráðuneytið frekar en að rembast við að koma mönnum inn á þing með takmörkuðum árangri? 

[Helgi Helgason (IP-tala skráð) 11.11.2009 kl. 14:48]

Þetta er allavega umhugsunarvert eftir öll þessi ár flokksins á þingi.

Bestu kveðjur